Mom thank you
$3.00 USD
Mother thank you for eeeeeeeeeeeevery single thing you did for me!
Printed on a coated 350grams card, super thick and glossy and comes with an envelope made out of recycled paper. The card size is 10.5 x 14.8 cm (4.1 x 5.8 inches).
Translations are in the back of each card.
All our cards are illustrated in Bonaire, with love.
Gotomeer (1)
For di tempu arkaiko ku e prome bishitante nan ku a pisa suela di Boneiru a laga nan prueba keda atras den e area di Rincon na Gotomeer. Na e Saliña Grandi aki nan tabata kome di laman; Karko, Piska, Turtuga, Kokolishi i Koncha. Ta trata di e indigeno nan di un tribu ku nan sentro banda di Coro, Venezuela. Nan tabata move durante e diferente temporada nan di aña pa diferente sitio pa buska kuminda. Na Boneiru na Goto tabata un di nan.
Gruta di Lourdes (2)
Despues di e indjan nan di temporada Arkaiko a bini e indjan nan di temporada di Serámika. Nan sí a biba den Rincon mes, entre otro na Gruta di Lourdes. E indjan nan aki no tabata solamente biba di laman, nan a praktika agrikultura tambe i pida serámika ser enkontra na Gruta di Lourdes. Huntu ku kaska di Karko, Kokolishi i Koncha.
Pos Bronswinkel (3)
Na Pos Bronswinkel tambe e indjan nan di temporada di ceramika a biba. E indjan nan aki a piska, planta i tabata tin wea i pòchi di serámika.
Kaumati (4)
E seru bunita na entrada di Rincon ta seru di Kaumati, un sitio sagrado pa e indjan nan. Aki nan a pinta figuranan religioso i spiritual. E nòmber di e formashon di piedra aki mes tambe ta prueba di presensia di indjan. Kaumati ta un palabra Arowako.
Onima (Inskripshon Spiritual di Indjan) (5)
Onima tambe tabata un sitio sagrado pa e indjan nan. Aki nan a pinta figuranan spiritual i laga atras komo prueba. Un di e sitio nan mas bishita pa mira inskripshon di indjan na Boneiru.
Inskripshon Spiritual na Fòntein (6)
Tras di un piedra na Fontein tambe a enkontra pintura di indjan. Pues tambe a sirbi komo un sitio sagrado pa e Indjan nan. Na e sitio nan nan tabata pinta entre otro rayo di solo posiblemente pa kalender i bestia nan di naturalesa ku nan tabata adora spiritualmente.
Pintura di Indjan na Karpata (7)
Bou di baraka na Karpata tambe tin pintura nan indjan, prueba ku aki tambe a sirbi komo sitio sagrado pa e habitante nan di Rincon aki.
Amerigo Vespucci ta jega Boneiru (8)
Na aña 1499 e Italiano Amerigo Vespucci a pisa suela di Boneiru. E tabata nabega den sirbishi di e Spaño nan bou di komando di Alonso de Ojeda. Vespucci a skirbi tokante su enkuentro na Boneiru;
"Nos a sali for di kosta firme (Venezuela) i na un distansia di 14 miya asina for di kosta firme nos a mira un isla i nos a disidi di eksplor'e i mira ku kisas tin un poblashon".
Durante e aña nan i diferente bishita di e Spaño nan tabata klasifika e indjan nan komo bobo, nan tabata kou riba blachi pa set, bebe awa for di sirena riba blachi di mata, bon piskadó i nan no tabata tin kas, si no ramada kontra awa i solo.
Mas bien e indjan nan tabata asina sabi ku nan no a mustra e Spaña nan nan pos nan ni e pueblo nan kaminda nan tabata tin kas.
Alfinal tòg e pas di e indjan nan Boneriano a ser kitá. E Spaño nan asta kohe algun indjan prezu na aña 1501 i hiba Spaña. A presenta un mucha muhe indjan pa Reina Isabela na Sevilla i a kuminsa bende sobra komo katibu den area nan suit di Spaña; Sevilla, Cadiz, Cordova y Jerez. 8 di desember 1501 Reina Isabella a indika ku mester hiba e Indjan nan Boneriano bek. Tabata kontra su lei pa molestia e indjan nan ora tabata nabega den karibe.
Posiblemente Pader Fernandez a soru pa por haña mas tantu Indjan bèk i laga nan liber pa nan regresa Boneiru. No tin prueba si alfinal nan a regresa.
Posiblemente Pader Fernandez a soru pa por haña mas tantu Indjan bèk i laga nan liber pa nan regresa Boneiru. No tin prueba si alfinal nan a regresa.
Hispañola i bèk Boneiru (9)
E Spaño nan a haña e isla inútil paso no tabata tin metal precioso, pues na 1515 nan a kue tur e indjan nan di e isla nan ABC i manda Hispañola pa traha den mina di koper. Mas o menos 2000 indjan. Na 1527 e Spaño nan e regresa e isla nan bek ku mas o menos 200 indjan i nan a disidi di konsentra riba loke sí tabata posibel i a keda.
Kapitanía (10)
Na 1527 ora e Spaño nan a regresa Boneiru nan a hasi e area di Rincon nan base, skohé stratégikamente i jamá Kapitanía. Parti pabou di e isla, mei mei di e seru nan, protegá for di kosta.
E palabra Rincón mes ta un gran prueba di afiliashon Spaño, Rincón ta nifika huki na Spaño. Na Kapitanía e Spaño nan a biba konhuntamente ku e Indjan nan i e enfoke tabata kapmentu, plantamentu i krio di bestia.
Ku e jegada di e prome kolonista nan e indjan nan pas sigur a wordu kitá, pero no mesun desastroso ku loke a pasa den e siglo nan despues.
Eksportashon di palu (11)
Metal presioso no tabata tin, pero sí un di e palu di mas fuerte na mundu; palu di Wayaká. Wayaká tabata wordu huza pa traha katrol di barku. Tambe a kap i eksporta Pal’i Brasia pa pigmènt korá i Watapana pa kurti kueru. Bestia nan ku tabata wordu kriá i eksportá tabata karne, kabritu, kabai, baka, porko i buriku.
100.000 kueru di karné (12)
Segun Aleman Richshoffers, ku tabata na Boneiru na aña 1630, mester a entrega 100.000 kueru di karne pa aña na e Rey di Spaña. Na 1620 for di un censo door di Obispo di Coro a konta 1620 katoliko, indjan. Pues tabata tin mas hende di ekterior riba e isla, posibelmente prezu nan Europeo mandá Boneiru pa traha den krio di bestia.
Enkuentro Spaño vs Hulandes (13)
Na aña 1630 un barku Hulandes a mara na Puerto de Barbudo (nomber di Playa antes) bou di komando di Andriaen Pater. E commandeur di e barku huntu ku su militar nan a baha na tera i kuminsa kana direkshon di Rincon, na kaminda nan a disidi bira bèk komo nan no a mira enkontra nada.
2 Marinero ku tambe a bai kana apart riba e isla i nan sí a jega den e area di Rincon. E Spaño nan a mata 1 marinero i herida e otro.
Kandela (14)
Adriaen Pater no a keda kontentu ku e morto di un di su marinero nan i siguiente dia el a bai Rincon pa tuma vengansa. Na Rincon e Hulandes nan a kima tur e kas nan ku nan a mira. Basta kas di Indjan no a ser kimá komo ku esaki nan tabata basta bon skondi.
Ora e Hulandes nan a kuminsa pa bai Puerto de Barbudo bèk e Spaño i Indjan nan a persigui nan i sende e yerba seku den kunuku nan na kandela pa saka e Hulandes nan for di nan teritorio. E huma e hera mata e Hulandes pero nan a retira i bai direkshon di Playa.
Karpata (15)
Riba menasa di varios barku di pirata nabegando den laman Caribe den e aña nan 1630 e Spaño nan di Boneiru a disidi di retira kompletu for di Puerto de Barbudo i bai nan base Kapitanía rondona dor di seru. Den e temporada nan barku nan a kuminsa mara na Karpata.
Porta Spañó (16)
E nomber 'Porta Spaño' a bini di Hulandes nan ku tabata referi na teritorio Spaño. E kas di plantashi na Columbia tabata tin e nòmber aki. Kual ta netamente na e bahada direkshon Fontein, net promé ku Sabana Piedra Krus.
Pirata Hulandes i Franses (17)
Na aña 1632/33 atrobe e Hulandes a bishita Boneiru, e biaha aki den haf tabata tin 2 barku Franses tambe mara. Proposito di e bishita nan tabata bishita di pirata, hortamentu di karné, kabritu i enbuskeda di awa. Tambe e Hulandes nan a kue 8 indjan prezu i bai ku nan.
Arku i Flecha (18)
E siguiente aña na 1633 e Kapitan di Venezuela (ku tabata dirigi e isla nan) a manda 20 indjan ku arku y flecha Boneiru huntu ku algun homber Spaño pa defende e isla kontra atake nan Hulandes i awor tambe Franses.
Den akshon kontra e pirata nan tabata tin 2 indjan Boneriano: Alonso Diaz i Miguel. Den dokumetashon esaki ta e prome nomber nan di persona nan di Boneiru di ku ta bini dilanti.
Despues ku Korsou a kai den man Hulandes na 1634 a keda un bai bin entre e Spaño nan i e Hulandes nan pa Boneiru.
E Hulandes nan a huza Korsou komo nan sentro di komersio i e Spaño nan kier a mantene Boneiru pa meskos.
E Hulandes nan a huza Korsou komo nan sentro di komersio i e Spaño nan kier a mantene Boneiru pa meskos.
Arku i Flecha a kaba (19)
Despues di algun bai bin arku i flecha di e Indjan i Spaño nan a kaba. Dia 3 di januari 1635 riba vlot a jega Kosta Firme na Coro 9 indjan ku nan famia. Entre otro Alonso Diaz.
Ora gobiernu Spaño a puntra Alono Diaz dikon e la hui for di Boneiru Alonso a deklara ku el a nase i semper a biba na Boneiru, pero den e ultimo aña nan e barku nan Hulandes ta keda bishita Boneiru i horta Palu di Brasil i Salu.
Indjan nan a bringa kontra nan i mata un paar di pirata. Alfinal flecha a kaba i no tabata tin boto pa bai Kosta Firme bai buska mas flecha. E kabesante nan Spaño na Boneiru a informa e indjan nan di e konkista di Korsou dor di e Hulandes nan i despues a retira for di Boneiru lagando e Indjan nan nan so. E Hulandes nan a krusa e isla ku skopet na man hortando karne, baka i kabritu. I pesei nos a disidi na traha un vlot i hui huntu ku nos muher i yui nan. 7 indjan a keda atras na Boneiru.
Maart 1635 ora e Hulandes nan a bin pa konkista Boneiru nan a enkontra 7 indjan so, kual tambe a hui despues a bordo di un skipper Franses ku a hiba nan Venezuela. Alfinal un warda Hulandes so a keda riba Boneiru i e isla a keda bashi pa algun aña.
West Indische Compagnie (20)
Na 1636 e Hulandes nan a konkista Boneiru definitivamente for di e Spaño nan i na 1639 nan a traha un Forti na Playa banda di Pos di Baka (den area di airport).
Gobiernu di Boneiru tabata eksisti di un warda militar di tabata bou di komando di West Indische Compagnie, i no Hulanda mes. Na kabes di e warda tabata tin un Commandeur.
E okupashon di Boneiru na e inisio di e Hulandes nan na 1636 tabata 40 soldá Hulandes, 13 neger, 7 indjan. Probablemente e 7 indjan nan ku a sali for di e isla último a regresa bek.
Na 1640 WIC a trese e prome Katibu Afrikano Boneiru.
Boneiru kompletu tabata bou di mando di WIC, no tabata tin ningun hende partikular riba e isla pa tur e aña nan.
Salu di Slagbaai (21)
Kontrario di e Spaño nan ku sí tabata tin nan mesun saliña nan di salu e interes di e Hulandes nan pa Boneiru su saliña nan di salu tabata sumamente haltu. E Hulandes nan pues a kuminsa ku eksportashon masal di salu, huntu ku lokual e Spaño ja kaba tabata eksporta.
Slagbaai (22)
Enfoke di WIC na Korsou tabata komersio di Katibu, i Boneiru a sirbi komo spijskamer di Korsou. E baye di Rincon i su seru nan a produsi palu pa karbon, karni i fruta pa manda Korsou. Slagbaai no tabata solamente un punto importante di eksportashon for di Rincon pa Korsou, pero su Saliña di Salu tabata e chèri riba e bolo.
Het Slavendorp Rincon (23)
For di 1636 te ku 1756 bida na Boneiru e keda por lo general meskos, bou di
komando di WIC, trahando komo katibu.
Na 1756 barku nan di pirata a kuminsa bira hopi aktivo bèk i na 1756 commandeur di WIC Korsou a duna commando na esun di Boneiru pa proteha WIC su poseshon nan: katibu, saliña, kunuku, bestia nan na kunuku i kasnan di WIC. Infasis tabata kuida spesialmente e katibu nan neger, esaki tambe tabata e motibu dikon semper e katibu nan mester a biba na Rincon. Strategikamente skohe meskos ku e Spaño nan, skondi tras di e seru nan.
Pues despues di 1756 a retira kasi tur kos atrobe for di Playa i sigui ku e enfoke riba ‘Het vallei van het Hoogland’. Pero esaki tabata solamente 1 definishon di e temporada Hulandes. Rincon tabata wordu jamá ‘Het Slavendorp Rincon’ te 1850.
E poblashon di ‘Het Slavendorp Rincon’ na 1699 tabata 137 katibu, na 1721 220 katibu, 100 aña despues 300 katibu.
Despues di abolishon di komersio di Katibu algu straño a pasa, e kantidat di Katibu na Boneiru a bira 816. E motibu di e oumento diripiente? Rincon no tabata solamente un Slavendorp mas, pero awor tambe un broedplaats di Katibu. Katibu nan fuerte tabata wordu manda Rincon pa multiplika, asina por a jega toch na Katibu “nobo” den e region, e isla di Boneiru tabata wordu jama Fok-eiland.
Zebuna, Panzo, Chiba (24)
Durante inventario di WIC na Plantashon Fontein na 1759 a anota nomber di 3 katibu: Zebuna, Panzo, Chiba.
Coral di Fontein (25)
For di e inventario di WIC na 1780 'Coral di Fontein' a konta 103 baka.
Magazina di Rei (26)
Manera e nòmber ta indika kaba, e edifisio aki a sirbi komo magazina pa warda alimento pa e Katibunan, kosecha i otro poseshon nan di Gobiernu. Magazina di Rei ta un edifisio di komienso di 1800. Na 1810 na e plantashi di Magazina di Rei a sirbi komo hospital pa e Katibunan tambe.
Nos ta un nashon liber (27)
Na aña 1791 WIC a jega su fin i Boneiru a kai bou di mando di Gobiernu Hulandes. Ora ku Gobiernu a tuma Boneiru over kos a kambia. Temporada di kolonisashon Spaño nan e indjan nan a haña obligashonnan pero tambe nan a keda ku previlegionan. Ora e kolonisador nan Hulandes a jega i e Indjannan kier a bai foi di Boneiru, e Commandeur Hulandes a priminti nan ku nan lo keda ku mesun obligashon i previlegio nan.
Prome nan tabata tin permit di kria bestia i planta. Pa e trabou nan pa gobiernu nan tabata risibi maishi, carni i bebida. Pa aña nobo tambe nan tabata risibi ekstra bebida ‘Buey’ i tela di osnabruk pa paña. Ora ku Gobiernu di Hulanda a tuma over mester a ekonomisá i kos a bira malu. E Indjan nan a perde sierto previlegio i wordu mal pagá pa nan trabou. Nada mas di Buey, ni tela di osnabruk, krio di sierto bestia so i na sierto kantidat. Riba eksportashon di karni pa Korsou mester a paga.
Riba dje fin di e aña nan 1700 komienso di 1800 tabata e aña nan di Revolushon Franses i tabata tin hopi wélga. Desgusta ku e situashon e Indjan nan a disidi di bringa pa nan derecho nan humano. Nan a pidi un maestro di skol na Korsou skibi un karta pa nan splikando ku nan ta un Nashon Liber i a perde nan previlegio nan. Gobernadornan no a hasi mashá ku e karta i 5 di juni 1805 e Indjan nan a disidi ku nan no kier traha mas pa Gobiernu.
“No tin tera bou di solo ku ta mas pober ku Boneiru” (28)
Na aña 1818 Pastoor Stoppel a bin bishita i traha na Boneiru pa 2 luna. Pa e jega Rincon e mester a subi riba un buriku, pasa kantu di laman, subi un seru i baha den Rincon; e kaminda bieu di Playa pa Rincon. Pastoor Stoppel a documenta ku e hende nan di Boneiru ta masha bon hende, un poko ignorante pero gusta siña. 5 aña di sekura tras di otro, 5 aña sin kosecha… “No tin tera bou di solo ku ta mas pober ku Boneiru” - Pastoor Stoppel
Promé Misa di Rincon (29)
E prome misa/sitio pa servicio di orashon tabata na Para Mira. Sentral mei mei di Rincon i e seru nan pabou, kaminda tabata tin basta hende ta biba. Por ehempel den e area di Dos Pos. Na 1827 ora ku Boneiru a haña su propio pastor, Bernardus Eisenbeil, el a laga traha un misa di bara na Para Mira. Na 1836 ku jegada di otro Pastor, esaki a opta pa traha un misa nobo, tambe di bara pero mas den sentro di Rincon (pabou di e misa aktual).
Lantamentu di Katibu (30)
Na aña 1765 i 1834 tabata tin lantamentu di Katibu na Boneiru. Na aña 1756 nan a lanta kontra trabou largu i pisa, mal nutrishon i mal kuido.
Na 1834 na Fontein Martis di Katalina Janga a lanta kontra un bomba ku a dal’e ku kabuya. Tabata den luna nan di trabou lento ku e Bomba tabata buta hopi preshon innesesario i Martis di Katalina Janga a lanta kontra e Bomba ku su chapi den su man.
“Het kan me weinig schelen om te sterven, het is hier toch geen plaats om te leven”
Bentura (31)
Bentura ta un Katibu basta cool. Bentura a logra hui i keda skondi den Rincon pa basta dia ku ayudo di e otro Katibu nan i e hende nan liber di Rincon. Pero alfinal Bentura a ser kaptura i será den prizòn na Fort Oranje. Pero na Forti tambe Bentura a logra hui dor di koba un buraku bou di e muraya di Fòrti i kana sali di dje bai kas.
Mundu Nobo (32)
Na 1850 Gobiernu a disidi di plama e katibu i e hende nan liber den Rincon un poko for di otro paso nan a kuminsa komporta malu den bista di gobernador nan. Por ehempel e katibu i e hende nan liber tabata yuda otro horta e kabritu nan di Rei. Katibu nan a bai Mundu Nobo (Tera Kora) i mayoria hende liber a bai Antriol.
E katibu nan ku mester a bai Mundu Nobo for di málkontentu pa laga nan bario atras a traha nan kas nan ku lomba pa Rincon.
Bario liber bèk (33)
1863, porfin abolishon di sklabitut i Rincon a bira un bario liber bèk. Despues di mas ku 300 aña bou di mando di kolonisador nan. Hulanda no tabata tin ganashi mas ku e isla i a disidi di bende kompletu na findishi. Famia nan ku sèn di Korsou a kumpra gran parti di Boneiru.
Despues ku e katibu nan a ser laga liber e trabou nan a keda por lo general kasi meskos si, solamente awor pa Shon nan privá i no obligá. Krio di bestia, kortamentu di sentebibu, kimamentu di karbon, plantamentu i piskamentu.
Santa Maria (34)
Despues di abolishon di sklabitut un grupo di katibu kier a kibra ku nan pasado a move bai untiki pariba di Rincon pa start un bida nobo, na Seru di Santa Maria.
Patia di Onima (35)
Onima tambe a kai den man di Shon i aya tabata planta fruta i berdura di dam. Onima tabata popular pa plantamentu di patia.
Karbón (36)
Den e seru i mondi nan será e hende nan liber di Playa i Rincon mes tabata bai kap mata pa kima pa karbon. Mas tantu den area di Labra i Brasiel i nan tabata pasa tin bes asta te 2 siman, kortando palu, kima karbon, hinka na saku pa eksporta. Karbon a keda ta esensial te ku introdukshon di stof di kerosin i gas.
Sentebibu (37)
Sentebibu tabata wordu plantá, kortá, hinka den un baki skuin pa e baba kore i lèk den un baki di heru. Sentebibu tambe tabata wordu eksportá. E area nan popular pa korta sentebibu tabata na Columbia, Labra i Karpata.
Washington (38)
Na 1920 full e area ku nos konose awe komo Washington tabata jama America. Na 1920 e doño nan a parti e area den 2 i a bende 2410 hectare ku Hermanos Herrera. E parti nobo di Hermanos Herrera a ser jamá Washington. Den temporada di Hermanos Herrera hopi Rinconero a haña trabou aki nan, meskos ku tabata e kaso na Onima, Columbia i Karpata.
Playa Funchi (39)
Na Playa Funchi e barku nan di Washington tabata mara, ser kargá i sali Kòrsou. Tabata tin un kas na Playa Funchi i un kura pa tene e kabritu nan aden wardando e barku nan jega.
Tereno di hür (40)
Na 1883 Gobernador Nicolaas van den Brandhof despues di un bishita na Boneiru a haña nesesario pa e hende nan di Rincon por jega na tereno di huur serka Gobiernu. Asina nan por a planta i kria bestia i soru pa nan mes provenir. Meskos ku nan tabata hasi riba e plantashi grandi nan, pero awor pa nan mes i asina hopi Rinconero a bira kunukero.
Lus di Kerosin (41)
Asina a bai ku e bida den Kapitanía, Het Slavendorp i awor simplemente jamá Rincon. Despues di 400 aña den man di kolonisador nan, Rincon na komienso di aña nan 1900 tabata ofrese un bida hopi simpel, kas nan di bara, un warda di polis pa mantene orden i illuminashon tabata ku lus di kerosin. Rincon tabata hopi skur.
Rincon a sali for di isolashon (42)
Aña 1921 tabata un aña remarkante, e aña ku Rincon a kuminsa sali for di isolashon, e aña ku liña di telefon a ser introdusi for di Playa pa Rincon. FIN!